ពីអាគារចាស់ សល់ពី សម័យប៉ុល ពត ក្លាយទៅជាភូមិគ្រិះ ព័ទ្ធដោយសួនធម្មជាតិ យ៉ាងមនោរម្យ!
ផ្ទះរបស់ឧត្តមសេនីយ៍ឯក ព្រហ្ម ផេង មេបញ្ជាការកងពលតូចអន្តរាគមន៍លេខ ១ ដែលមានទីតាំងនៅភ្នំព្រះរាជទ្រព្យ គឺជាកន្លែងដែលបានកសាង និងជួសជុលយ៉ាងយកចិត្តទុកដាក់ជាង ១៥ ឆ្នាំមកហើយ។ ផ្ទះនេះមិនត្រឹមតែជាលំនៅឋានប៉ុណ្ណោះទេ ថែមទាំងបង្កប់នូវប្រវត្តិ និងការខិតខំបង្កើតបរិស្ថានធម្មជាតិដ៏ស្រស់បំព្រង។
ទន្ទឹមនឹងនេះ ផ្ទះនេះមានស្រះទឹកចំនួន ៤ កន្លែង ដែលបានបង្កើតឡើងតាមរយៈការប្រគេនអាចម៍ដីទៅព្រះសង្ឃ ដើម្បីសាងសង់ឃឿនព្រះវិហារ និងចាក់បំពេញទីធ្លានៅពុទ្ធមណ្ឌលវិបស្សនាធុរៈ នៃព្រះរាជាណាចក្រកម្ពុជា។ ការប្រើប្រាស់ធនធានដីបែបនេះ បង្ហាញពីការយកចិត្តទុកដាក់ចំពោះសហគមន៍ និងការអភិវឌ្ឍសាសនា។
ចំពោះផ្ទៃដីជុំវិញផ្ទះ មានទំហំសរុប ៧,៥ ហិកតា។ ដើមឡើយ ដីនេះមានត្រឹម ២ ហិកតាប៉ុណ្ណោះ ប៉ុន្តែក្រោយមក លោកឧត្តមសេនីយ៍បានទិញបន្ថែម ៥,៥ ហិកតា ក្នុងតម្លៃចន្លោះពី ០,២ ទៅ ០,៣ ដុល្លារក្នុងមួយម៉ែត្រការ៉េ។ ការពង្រីកនេះបានធ្វើឱ្យកន្លែងនេះក្លាយជាតំបន់ធំទូលាយ និងស័ក្តិសមសម្រាប់ការដាំដុះ។
ជាអ្នកស្រឡាញ់ធម្មជាតិ និងផ្កា ឧត្តមសេនីយ៍ឯក ព្រហ្ម ផេង បានផ្តោតលើការដាំដើមឈើដ៏មានតម្លៃដូចជា ក្រញូង ធ្នុង បេង និងដើមឈើហូបផ្លែមួយចំនួនដូចជា ព្រីង ស្វាយ ធុរេន និងបឺរ។ លើសពីនេះ លោកក៏បានរៀបចំសួនច្បារដ៏ស្រស់ស្អាត ដែលបន្ថែមភាពទាក់ទាញដល់ទីតាំងនេះ។
ផ្ទះ និងទីធ្លាជុំវិញរបស់ឧត្តមសេនីយ៍ឯក ព្រហ្ម ផេង មិនត្រឹមតែជាកន្លែងសម្រាកប៉ុណ្ណោះទេ ថែមទាំងជានិមិត្តរូបនៃការអភិរក្សប្រវត្តិ និងការយកចិត្តទុកដាក់លើធម្មជាតិ ដែលឆ្លុះបញ្ចាំងពីចក្ខុវិស័យរបស់លោកក្នុងការបង្កើតបរិស្ថានរស់នៅប្រកបដោយចីរភាព។
អត្ថបទ ៖ គីម ណារ៉ាក់